相機食先的女孩: 北九州

顯示具有 北九州 標籤的文章。顯示所有文章

2017年8月23日星期三

盤點大分由布院人氣美食（必食半熟芝士蛋糕、蜂蜜雪糕、地雞釜飯)

1. 由布院 Milch ミルヒ 半熟芝士蛋糕

沿住由布院湯之坪街道一路直行，就會見到Milch，入面嘅半熟芝士蛋糕係店舖名物，不能錯過，有熱有凍，我揀佐熱食，入面嘅芝士奶油味道非常香濃，而且質感香滑，半熟流心度岩岩好，完全唔會覺漏，蛋糕亦夠濕潤，好好好好食！

2. 由布院 Milch ミルヒ 布丁

由布院Milch唔單止半熟蛋糕出名，用100%由布院產牛乳製成嘅布丁一樣好好食！有原味(300YEN)同抹茶（350YEN)兩種口味，兩款都各有千秋。原味奶味不算太濃，但蛋香突出，加上底下嘅焦糖醬味道好夾，布丁口感亦非常滑順；抹茶味一共有三層，抹茶布甸、抹茶果凍同埋牛乳果凍，口感豐富！而且抹茶則用咗八女抹茶，抹茶香濃帶回甘，抹茶同牛乳味道都平衡到，正！

3. みつばち工房花の道

一日限量50個的布丁蜂蜜雪糕（500yen)，加佐50yen落蜜糖，下層係滑溜嘅布丁，上層就係蜂蜜雪糕，兩樣一齊食時口感好豐富，雪糕本身嘅蜂蜜同牛奶味都好突出！

4. Cafe HIVE

喺みつばち工房花の道正對面，有同樣岀色嘅蜂蜜雪糕！雪糕質感好好，實得黎好滑，而且每啖都有好濃郁嘅蜂蜜味，味道清香。而且門面好靚，影相一流！哈哈！

5. B-speak

湯布院最岀名嘅甜品一定係B-Speak卷蛋！一場來到，當然要試試。我地早一日預訂，第二日唔使排隊就有得拎，然後可以拎上去由布院之森慢慢嘆。卷蛋cream甜而不膩，蛋糕有彈性，整體唔差，但個人認為未去到神級，因爲比佢岀色嘅日本卷蛋有更多，好似Mon cher, 8b dolce同茶之環卷蛋嘅cream更加輕盈，蛋糕更有蛋香，所以食唔到都唔係十分可惜嘅，但如果book到，咁都可以唔爭在食埋佢，哈哈。

6. 由布まぶし心

一去到就即刻去由布まぶし心食lunch，但唔記得佐book枱，所以等位等佐30min左右，不過等位都係值得嘅。店內有三種口味釜飯: 地雞、鰻、豐後牛，全部都一飯三食。

第一食：將飯、材料及醬汁攪拌完盛在小碗裡，直接品嚐原味
第二食：自由加入調味料，如：柚子胡椒
第三食：加入高湯變茶漬飯

一次過試齊三款，我覺得地雞同豐後牛都好好食呀！地雞好滑嫩，而且散發炭香，米飯吸收醬汁嘅味，好入味，而且米飯黏性好好，有口感，就咁食飯已經好正。

豐後牛嘅飯對比地雞飯會冇咁入味，但嗰幾片牛真係不得了，好重好重牛味，油脂分佈平均，幾乎入口即溶，好回味。

鰻魚相對就非常普通，烤得乾身，外皮偏燶，不是我杯茶。

每個人都會有一盤漬物同一碗味噌湯，所以超飽。

PS. 由布院站有2間分店，我地去佐車站附近嗰間，出站後直走3min左手邊就係，金麟湖本店聽講旅遊團比較多。

7. 鞠智 cucuchi

由布院著名嘅豐後牛可樂餅，不過我覺得不試也罷，因為入面幾乎全部都係薯蓉，完全睇唔到有牛，食落就係普通可樂餅，但就因為多佐豐後牛三隻字而收貴好多...

-------------------

其他福岡遊記：

豐富的懷石料理@由布院山光園

由布院一泊二食推介－－山光園

福岡五大人氣甜品の評論

【睇花、睇動物、玩歷奇活動】海之中道海濱公園

精選6間福岡必去餐廳

------------------------------

更多福岡北九州美食介紹可去：

Instagram Facebook Blogspot Ublog BE She GetReadyHongKong theZtyle itrial style-tips Love beaute HK

Email: tung42329@gmail.com

✿ 歡迎邀稿│合作試用│出席活動 ✿

2017年8月1日星期二

精選6間福岡必去餐廳

1. ひょうたん寿司

活燒鮑魚就試過，但就咁生食鮑魚真係第一次。佢郩到喺件壽司上面跌落黎，但擺落口其實又唔係好覺佢郩，口感爽脆，都幾鮮美。

我地係點佐壽司定食set2850yen（~hkd200)，有十件壽司，當中仲要有鮑魚、三文魚子、海膽、拖羅，真係好平，所以我地索性點佐兩份。三文魚子多到滿瀉，海膽就一般，不過其他魚壽司都好食。個set仲送味噌魚湯，整體勝在性價比高。

PS ひょうたん寿司係人氣壽司店，即使日本人都會排隊食，嗰日平日630pm左右大概等左20min。

2. 博多ラーメン膳

喺天神附近行完街要醫肚，原先諗住食一蘭，但我地太多人有排等兼要分開坐，惟有放棄。行下行下喺eggs n things附近發現佐一間平價拉麵店，最平280yen有一碗，頭兩碗多d肉已經最貴480yen(溏心蛋一隻+100yen)，第三碗少d肉就280yen，超平！

味道唔係超班，但以呢個價絕對超值。麵質同湯底調味都ok唔錯，係叉燒一般般啦，不過一碗差唔多等於2.5碗一蘭呀，食完留多佐銀兩可以買多d野！

3. かしわ屋源次郎

博多駅嘅かしわ屋源次郎主打雞料理，夜晚我地黎佐食水炊鍋同親子丼。

先講下個親子丼，好岀色！

雞肉同蛋都滑到不得了，北崎雞肉其實雞味唔算好岀，但滑嫩唔鞋口，滑蛋反而蛋香濃d。 1200yen有漬物同雞湯。

水炊鍋即係打邊爐，我個人好中意，因為好清淡完全唔油膩，雖然份量比較少（幅火鍋材料圖係二人份量架啦）不過加埋其他細細碟同最後打底嘅烏冬都飽嘅。set入面嘅厚燒玉子、冷豆腐、燒雞皮同麻醬沙律都好正！

4. 麺や兼虎

呢間嘅沾麵喺tabelog頭幾位，雖然位置唔係好近遊客區，但為佐食好西，搭多個站又有咩所謂。（所以買1day pass真係抵，搭三程都回本！）同埋都好近想食的pancake店 cafe de sol，所以都順路，沾麵店喺赤坂站行10min就到，7pm去到都要等陣位，因為好多日本人去！正！呢度其實岀名辛辣，仲有唔同辣度揀，我們唔係好食得辣，但都點佐沾麵辣+唔辣各一，同拉麵辣+唔辣各一。沾麵200g/300g都同價（我全部揀200g)，麵質好爽口彈牙，掛湯度不錯，湯底充滿魚介香夠濃郁，不過辣嗰款我覺得真係幾辛辣！湯入面嘅叉燒肥瘦相間，好鬆化，少少唔好嘅係，湯食食下就會涼得好快。

拉麵試佐一啖，都好有彈性，好食！辛辣揀佐BB班，但反而辣度接受到。鍾意食辣嘅可以挑戰下辣度高d嘅～

5. たんやHAKATA店

福岡超人氣早餐之燒❣️喺「博多一番街」裡面嘅たんやHAKATA店牛舌朝食其實都好岀名架啦，460yen左右就食到燒牛舌，好平好抵食

一份大約有4-5塊牛舌，即點即燒，用炭火燒過後，炭火香氣十足，食落好爽口！加100yen要佐生雞蛋，撈埋飯食好滑。飯可以免費添，仲有免費咖啡提供。

另外牛舌咖喱飯就有厚切牛舌，口感軟腍嫩滑，肉香味濃，個人都係偏好厚切口感。咖哩飯一樣好食！價錢好似係650yen左右。

PS 早餐7-1030am 提供(假日至10am)

6. 博多季樂
因為我哋唔會去佐賀縣，所以就去咗季樂的福岡分店，一樣咁正！我哋中午食，會否晚市平好多，試咗佐賀A3 同A5和牛，A3牛味岀，A5入口即溶，各有特色！炒飯另加500yen，但都一定要加，佢會撈埋牛肉嘅肥膏，完全冇浪費。甜品有蜜瓜、桃同抹茶啫喱，又係不得了！！！呢個係成個福岡旅程其中一餐最正嘅！

-------------------

其他福岡遊記：

豐富的懷石料理@由布院山光園

由布院一泊二食推介－－山光園

福岡五大人氣甜品の評論
【睇花、睇動物、玩歷奇活動】海之中道海濱公園
精選6間福岡必去餐廳

------------------------------

更多福岡北九州美食介紹可去：

Instagram Facebook Blogspot Ublog BE She GetReadyHongKong theZtyle itrial style-tips

Email: tung42329@gmail.com
✿ 歡迎邀稿│合作試用│出席活動 ✿

2017年7月22日星期六

福岡五大人氣甜品の評論

1.蜂楽饅頭
博多阪急B2嘅超市就好似銅鑼灣SOGO嘅B2，吃貨必到。識揀梗係要揀d香港仲未進駐嘅，呢間福岡老店嘅蜂樂饅頭值得一試！其實即係類似車輪餅，不過餅皮就落佐國產嘅蜂蜜。

試齊黑白(紅豆同白鳳豆)兩種口味，兩款都好味。甜度適中，餅皮煙韌，紅豆豆沙軟綿得黎又食到粒粒口感；白鳳豆口味香港比較少見，不過都唔錯，味道清甜。每個冇記錯都係100yen咋，口痕食下岩曬。

PS. 岩田屋超市同福岡阪急都有舖！

2. 果実工房新Sun.

博多阪急B2超市嘅果実工房新Sun，主打高級水果撻，我由day 1見到已經想食，但次次夜晚去到都售罄，因為勁多日本人買，結果到差不多最後一日嘅下午，我地決定買佐先講。揀佐宮崎芒果撻 以及 車厘子撻 ，兩款賣相都好吸引，不過可能期望越大，失望越大，兩款嘅撻底都屬於厚實型，唔係酥脆嗰類，唔係我杯茶。水果特別係宮崎芒果亦冇甜到令人驚艷嘅程度，有d失望。

3. Mon Cher

一直覺得 Mon Cher堂島卷蛋好食，忌廉香濃而不膩，雖然香港都有分店，但來到日本當然要留意期間限定的口味。今次去就有期間限定的檸檬味！買佐半條黎試，檸檬味道突出得來好清香，味道清新，食落酸酸甜甜，一d都唔漏，正！

4. Café del SOL

黎日本一定要食pancake，揀佐呢間好多人話好食嘅 Cafe de Sol ，但都幾失望下。食過東京bills同北海道円山真係番唔到轉頭，會對pancakes好高要求。呢間雖然比較大份同價錢較平（除佐caramel嗰款，其他唔過hkd100)，但完全冇蛋香，質感都未夠fluffy，點佐三款唔同都係靠各自嘅sauce帶味，但maple syrup又唔夠濃，芒果嗰款落嘅椰奶又好淡，比較好食係焦糖。

飲品點佐honey banana milk，有d似香蕉奶昔，因為新鮮即整，所以都幾好飲，但質感比較稠，所以都幾飽濟，同埋飲管唔夠粗，飲得比較辛苦。留意番，呢度每人最少一個order。

5. Il Forno Del Mignon

其實....我對呢度嘅牛角包係極度失望。次次去博多站都見到有好多人排隊，諗住d貨去得快，點都唔會差啦，點知作為一間名店都真係幾唔得，我絕對懷疑係咪純粹因爲地理位置方便先咁多人買。牛角包原味欠牛油香，外層微焦乾身，食落完全冇外酥內軟，整體口感欠層次。我仲試佐朱古力味、almond同明太子味，都係唔ok。其實香港 Urban Bakery、LE SALON DE THE de Joel Robouchon 嘅岀品真係岀色太多。