【南紀白浜】性價比高漁市場～Toretoreとれとれ市場

【南紀白浜】和歌山縣有兩個出名嘅魚市場，一個係黑潮市場，另一個就係白浜嘅Toretoreとれとれ市場。黑潮市場感覺主要做遊客生意為主，相對下我就覺得tore tore值得去多d啦。

呢度最出名係燒海鮮，聽講質素平靚正，燒烤爐嘅入場費大概300yen，不過我哋來之前已經食咗嘢，所以冇試到。是次tore tore我哋嘅目標係刺身。

老實講，呢度嘅刺身質素都係唔夠同築地或者黑門市場高。但係呢度嘅刺身勝在整體價錢便宜，例如我買嘅呢個壽司拼盤只係2000yen！

帶子刺身都幾好，柔軟有鮮味，盛惠880yen！性價比算係好高！

不過馬糞海膽就比較貴，要5000yen左右，平時買開都只係3000yen。可能因為咁，我買嘅平平海膽丼嘅海膽屬普通貨色，唔係特別鮮甜，略為失望。

呢度都有劏吞拿魚show，如果時間啱不妨停低睇埋！

除咗刺身，仲有乾貨、手信、梅酒、水果等店舖。和歌山最出名梅，一早計劃好要買梅酒嘅我哋喺tore tore買就最啱啦，因為梅酒款式好多，仲有得試味，可以試到滿意先買。新鮮柑橘汁都幾好飲，不過印象中價錢偏貴，同埋都比較細杯，不過柑橘又係和歌山特產，循例都要試試嘅XDD

入面仲有一間賣雞蛋蛋糕布甸，230yen，上層係充滿濃郁蛋香嘅雞蛋蛋糕，下層係香滑嘅雞蛋布甸，一次過食齊兩種口感，超級超級好食！

仲有一間手信店賣梅酒蛋糕，蛋糕質地濕潤充滿酒香，令人回味。得tore tore 先有得賣咋！

門口仲有一間賣蕨餅同梅雪糕，都唔好錯過呢！

Tore Tore Market交通：
白浜駅外面乘坐「明光巴士」在" とれとれ市場前"下車 
地址：日本和歌山縣西牟婁郡白浜野堅田2521 
營業時間：8:30am-6:30pm
－－－

更多旅遊介紹可去我的facebook: 相機食先的女孩
Instagram Facebook  Blogspot  Ublog  BE  She  GetReadyHongKong theZtyle itrial style-tips

Email: tung42329@gmail.com

✿ 歡迎邀稿│合作試用│出席活動 ✿