大圍美食推介【手撕雞腸粉/豆腐花/泰國菜/台式文青cafe/意大利菜】

以前去大圍通常都係去踩單車，但自從去咗大圍工作後，發現大圍都有美食呢！

1. 華輝小食 
華輝嘅手撕雞腸粉（$30），openrice話10am開，但原來8am去到已經開佐啦！手撕雞份量都唔少，腸粉先係重點，又滑又香，就咁配上好香嘅麻油花生醬已經好食。鍾意食辣嘅仲可以揀唔同程度嘅辣度，仲有得打大佬，但我本身唔食得辣就走佐辣喇。聽講個辣醬真係幾好架！

【地址：大圍大圍道71號富嘉花園地下28號舖】

2. 金曼谷泰國餐廳
同同事一齊叫外賣食。好好食嘅泰國菜，樣樣都好有水準！生菜包有成盒肉碎俾你裝，菠蘿炒飯炒得乾身又多料，青咖哩雞飯調味剛好，雞肉嫩滑。惟一係金邊粉麻麻地，炒到一pat pat，不過整體好好食，而且夠抵食，菠蘿炒飯連飲品都係$38咋！

【地址：大圍田心村地下264號舖】

3. The Grove Cafe
喺下徑口村嘅一間台式cafe，入面其實環境幾有文青feel，但我就選擇同同事叫外賣。呢個糖醋排骨飯嘅排骨都幾腍，糖醋味可以再濃d入味d，不過蛋冇咩味。價錢方面我覺得偏貴，$58冇飲品又份量細。

而鹵水拼盤，有雞翼、牛𦟌、蛋、豆腐，唔會鹵得好鹹，但豆腐同雞翼如果入味d就更好啦。

地址：大圍下徑口村30號地舖

4. 大圍亞婆豆腐花
大圍火車站出面嘅豆腐花店。都好多人食！叫佐一碗花奶豆腐花($13)，豆腐花本身唔算好滑，豆味一般，好彩加佐花奶口感順滑好多，落完花奶都唔會好甜，我都仲要落好多黃糖，但價錢就有d貴。對比豆腐花，芝麻豆漿更加推薦！

【地址：大圍村南道15-35號富嘉花園地下18A號舖】

5. M3 Italian
主打正宗意大利菜嘅西餐廳。我夜晚去食，雖然無set dinner，但a la carte價錢都合理。我點咗M3沙律($148)，材料多元化，而且用料都比較名貴，有香草烤雞、三文魚、Parma ham、羊奶芝士、蕃茄乾同什菜沙律。三文魚因為厚切，食落口感更加豐富。我特別鍾意加埋羊奶芝士，味道更有層次。

法國鵝肝意大利雲吞配蕃茄醬（$158）都好有水準。雲吞皮厚薄適中，略有厚度。入面嘅鵝肝餡料味道濃郁脂香十足，配上酸酸甜甜嘅新鮮番茄醬，減低膩感，起中和作用。 

除咗主菜，甜品都要留肚試！蛋黃慕絲配白酒／雜莓啫喱紅桑子汁($54) 甜品分兩層，上層係蛋黃慕絲配白酒，質感軟滑嘅慕絲食落酒香四溢，極有驚喜。而下層嘅雜莓啫喱就另一感覺，配紅桑子汁，酸酸甜甜，味道比較清新開胃。一次過食晒兩層，質感同味道都好有層次！ 

整體食物水準幾好，味道正宗，環境浪漫！

【地址：大圍積富街33號積康樓地下E-G舖】
－－－

更多美食介紹可去:

Instagram  Facebook Blogspot  Ublog  BE  She  GetReadyHongKong theZtyle itrial style-tips

Email: tung42329@gmail.com

✿ 歡迎邀稿│合作試用│出席活動 ✿