平民價嘆酒店下午茶@uptop bistro

呢排食咗幾個AFTERNOON TEA SET，

呢間位於珀薈酒店19樓嘅UPTOP BISTRO最近推出咗夏日北海道下午茶
價錢比較相宜，質素亦對得住價錢，賣相亦唔錯容易打卡。
夏日北海道下午茶以北海道富良野3.7牛乳整成鹹甜點各5款及飲品，唔少都頗有特色，盡見心思。

鹹點：

北海道牛奶蟹肉薯球

黑松露雞蛋沙律三文治

煙三文魚配黑魚子

明太子雞翼

大蝦菠蘿串燒

甜點：

北海道牛乳椰子球

北海道富良野3.7牛乳布丁

北海道富良野3.7牛乳炸鮮奶

牛奶朱古力芝士蛋糕

鬆餅配伯爵茶醬及北海道富良野3.7牛乳士多啤梨果醬

鹹點賣相精緻，最鐘意食煙三文魚配黑魚子，煙三文魚厚切肥美，包住粒粒黑魚子，口感有層次！黑松露雞蛋沙律三文治食落充滿黑松露香，不過如果雞蛋沙律改為牛乳炒蛋就更好啦！明太子雞翼皮脆肉嫩，入面塞滿鹹鮮茄明太子，同樣好食。大蝦菠蘿串燒就較為普通，驚喜不大。北海道牛奶蟹肉薯球炸得香口，入面係流心嘅牛奶薯球，外脆內軟，奶香十足，不過就完全食唔到蟹肉。

下午茶重點當然係鬆餅，呢度嘅鬆餅雖然牛油香一般，但兩款果醬大大加分。特別係伯爵茶醬，伯爵茶味香醇，甜而不膩，同熱辣辣嘅鬆餅味道好夾。士多啤梨果醬創新低加入北海道富良野3.7牛乳，果香依然，但味道更豐富，都唔錯。

甜品方面，牛乳布丁最得我心，質感香滑，用上3.7牛乳奶味特別濃郁。牛奶朱古力芝士蛋糕可能因為加咗牛奶又加咗朱古力，所以甜度稍高。炸鮮奶幾特別。牛乳椰子球如果減低甜度會更好。

加$32點咗一杯士多啤梨牛油果奶昔特飲，奶昔用北海道富良野3.7牛乳，奶香十足，入口幼滑，同時士多啤梨及牛油果味都好平衡，味道天然唔人工，凍冰冰好解渴。

－－－

更多美食介紹可去:

Instagram  Facebook Blogspot  Ublog  BE  She  GetReadyHongKong theZtyle style-tips

Email: tung42329@gmail.com

✿ 歡迎邀稿│合作試用│出席活動 ✿