體驗香港新五星級瑰麗酒店下午茶The butterfly room, Rosewood Hong Kong

想食好耐嘅Rosewood下午茶，謝謝妹妹早咗一個月訂位同我慶祝生日！

同一般酒店下午茶唔同，呢度分五個 courses：Savory canapes、Elegant surprise、Freshly Baked Scone、Pastry Trolley以及Confectionery Trolley朱古力（$720/2位，3位份量需另加$380)。

另外每人都包一杯飲品。

鹹點樣樣都好精緻，我最鍾意食紅菜頭鵝肝珍寶珠，外面甜酸，入面是軟滑香濃嘅鵝肝醬！煙三文魚魚子卷非常餡鮮，我本人都幾鐘意食中式叉燒酥，個皮做得好鬆化，不過松露蛋撻個皮就偏腍，口感一般。
值得一提嘅係，因為酒店想擺碟靚D，所以我哋3位都會照上4人咸點份量，即刻覺得好抵，哈哈！

Elegant surprise隔一段時間就會轉，今次係七彩蔬菜三文治，味道豐富，配上sour cream，都幾清新。

第三道 Scone每人有一個，有原味同提子味兩款。
開頭職員送漏咗一個scone略為扣分，如果可以問埋我哋想要邊款會比較好。
Scones質素還好，唔會焗到過乾，但始終無文華東方咁重牛油香，果醬甜度稍高，clotted cream亦唔夠軟滑奶香。

反而Madeleine 就可有水準，外脆內軟，入口仍然係微暖，一粒一啖，好食！

之後就係甜品車啦！
職員會推車逐一介紹，每人可以揀兩款，如果仲有想試嘅，之後都可以refill。

每款都好吸引，我哋3個人屬性點齊6款蛋糕share，最推薦覆盆子撻，酸甜有致，撻皮夠脆！杏桃撻都果香十足，質感濕潤。Cupcake我本身一般般，估唔到都ok，蛋糕濕潤，忌廉香滑之餘又唔會太甜。反而開心果Eclairs就太甜，唔太建議。

最後嘅Chocolate Trolley真係非常邪惡！
原先都想樣樣試下，但實在眼闊肚窄，只係食咗黑森林蛋糕、Butterfly kiss及手工朱古力。

黑森林蛋糕好出色，奶油綿密香滑，蛋糕濕潤帶酒香，我竟然忍唔住食咗大半件！反而招牌Butterfly Kiss內裡夾住棉花糖及果醬，食起來就比較甜漏，唔係我杯茶。

整體嚟講，而Rosewood嘅名氣，食下午茶可以食到咁飽，我覺得都抵，哈哈。