2018年4月24日 星期二

遇上無良皮膚科醫生 劉家豪醫生

2星期前因為皮膚問題去睇皮膚專科醫生,睇咗一個好冇醫德嘅醫生,為咗唔想更多人受害,我索性開名啦,就係佐敦恆城大廈 劉家豪醫生
事緣我覺得藥費十分昂貴,抗生素收$75一粒,仲未計藥膏等,而我知道自己嘅情況需要食3-6個月抗生素,小數怕長計,咁我就第二次覆診嘅時候,請呢位劉家豪醫生開藥紙比我,等我可以出去配。
點知呢個醫生堅持唔肯,仲話如果唔喺佢度配藥就會blacklist我,以後冇得睇佢...
個姑娘又覺得我喺度搞事...
其實嗰一刻係真係好驚,唔知自己做錯咗咩,搞到醫生咁大反應。

咁最後我就喺自己facebook page度分享咗呢件事,多謝大家比我知道我問醫生攞藥紙其實冇問題,大家仲好好咁介紹咗好多皮膚專科醫生同中醫等比我!

咁昨天我就去咗另一位中環嘅皮膚專科醫生覆診,醫生好有耐性,解釋得好清楚。
最後重點嚟啦!
喺新醫生度配同一款原廠抗生素,竟然只係$12-13/粒,平咗接近6倍!
假設我喺嗰位『劉家豪醫生』睇兼配6個月藥,要俾$13500,而家喺而家呢位醫生度配只係$2340 @@
昨天知道咗真係O咗咀,$12-13/粒都已經有錢賺,究竟呢位『劉家豪醫生』食水有幾深?!

大家想知我而家睇緊邊位醫生都可以pm我。
之後食完抗生素都要睇中醫調理一下身體,有好介紹麻煩同我講聲 :)

************************************************
好啦,咁其實我點解要睇醫生仲要食咁耐抗生素?
話說我確診咗玫瑰痤瘡(Rosacea),我本身皮膚容易敏感,係濕疹底,所以都容易有呢個病
但係玫瑰痤瘡同濕疹嘅治療方法係完全唔同,玫瑰痤瘡係唔用得類固醇!
而我由細到大都容易面紅,雖然之前打過彩光同激光已經改善咗好多泛紅嘅情況,但月頭發現無啦啦生咗太多類似暗瘡的東東,所以就立即去睇醫生
睇番資料先知,原來我嘅情況已經由泛紅血管型演化成第三階段的丘疹型玫瑰痤瘡
知道咗問題根源之後,我都換曬成set護膚品,全部要保濕低敏;注意控制情緒;避免食辣嘅食物及酒精;避免曬太陽;
暫時進展良好,遲些慢慢再同大家分享我與「玫瑰痤瘡」嘅抗戰成果!
Related Posts Plugin for WordPress, Blogger...