食足9道菜的全蟹盛宴@輝哥私房菜

 10－12月係大閘蟹季，去咗輝哥私房菜食呢個全蟹盛宴，網上訂購有半價優惠，人均二百多元，除咗有9道以蟹入饌嘅菜式，仲包陳年花雕、紅白酒、啤酒、果汁及汽水等飲品任飲，如果四位或以上仲送一隻避風塘龍蝦（約1斤）添！

因為好抵食嘅關係，平日晚市都座無虛席，連幾間VIP房都full咗，好誇張！

全蟹盛宴有d菜式有得揀，我就揀咗：

清水大閘蟹 （可自選 約5兩蟹公 或 約4兩蟹乸）

今年第一隻大閘蟹，我哋揀咗蟹公。店員好好人咁幫我拆蟹，邊拆邊講解，拆完成隻蟹都砌得返，好勁！

呢隻蟹公好肥美，鮮黃色嘅蟹膏味道香醇濃厚，配花雕特別夾！

食完成隻蟹，店員仲好細心咁送上黑糖老薑茶驅寒暖胃！

日式釀焗蟹蓋

原來蟹蓋裝住焗芝士忌廉通粉，如果真係加D蟹肉就更貼合主題啦！

蟹膏香脆鍋巴

鍋巴口感爽脆，面頭放上金黃嘅蟹膏，除咗適合作為餐前小食，亦可以同湯一齊飲增加口感！

鮑魚海參元貝燉竹絲雞湯

湯可以揀蟹肉羹或鮑魚海參元貝燉竹絲雞湯，揀咗後者冇令我失望。燉湯真材實料，用多種名貴食材熬製，每啖都係精華，非常鮮甜美味！

大閘蟹粉扒菜苗

菜苗好嫩，淋上大閘蟹粉，增添鮮味。

活蟹龍崗雞煲

蟹鉗啖啖肉，同龍崗雞一齊炒香，好惹味！雞肉亦肉味都幾突出，肉質嫩滑。

蟹黃炒飯
呢個炒飯賣相遜色，材料唔夠豐富，飯亦有d硬，有改善空間。

黑毛豬蟹粉灌湯餃

一人一隻灌湯餃，好開心！灌湯餃皮薄餡靚，用黑毛豬做內餡，肉味較為濃郁，湯頭鮮甜富肉香，並加入蟹粉點綴，有驚喜！

蟹肉果醬曲奇撻

好少甜品以蟹肉入饌，幾特別。

整體味道不過不失，雖然唔算驚艷，但$298／位有9道蟹菜式兼紅白酒、啤酒、花雕、汽水任飲都抵食嘅。店員服務殷勤友善，值得一讚。唯一係餐廳環境係酒樓格局，洗手間嘅衛生情況有待改善。

Togetda 訂購網址：https://bit.ly/3yuqZbd